2016年3月20日 DAY 6 Part 2 - Q's mall -> 通天閣
由大阪城碌返出嚟森之宮，附近有一個近年開的新地方 - Q's mall，它的特色是天台有一個人造跑步草地徑，供市民做運動。由於天台的跑步徑從來沒有見過，所以今日就揀左在此商場食LUNCH，順道參觀一下。
今日簡單地在FOOD COURT食一餐，食完我呀媽對對面的100YEN店(非DAISY)有好大興趣，專攻一埋MADE IN JAPAN的貨品。
樓下有超市，不過我倒民宿下的黑門市場更新鮮，所以我地就忍手沒有買了。不過就買左兩杯鮮渣果汁，好好味呀。
之後我地就去另一個週遊卡景點 - 通天閣。大人原價要700YEN，我地又免費了!不過我地到步後發現好多人，排隊的話要等一個鐘，所以我地放棄了登上觀景層，先回民宿休息休息。
2016年3月20日 DAY 6 Part 1 - 心齋橋 -> 大阪城 -> 大阪城天守閣
今天是週遊卡第二天，當然又要好好利用，任玩景點及任搭交通。
朝早起床我就自己出門去換晚上坐道頓堀水上觀光船的票，同時把早餐外賣回來給老媽，好讓她先好好休息，養足精神去踩今天的行程。
售票處就在激安之殿堂旁邊的藍小亭，想不到我十點多來到，他晚上的兩個時段已經滿座了，最後我買了21:00的票，因為夜景比日間更漂亮。
.
之後就開始買早餐，其實都沒有想方想買咩，但知道週街都有野食，所以憑感覺買就可以了。
一換完船票我就見到對面有一間自稱是人氣章魚小丸子店，還要開始排隊才可以買，所以我就決定買一盒試一試。
之後就返黑門市場再加少少小食，哇~ 白色草莓平時買來食都唔平，完全唔捨得拎去渣汁，但日本人竟然用這麼多的白色草莓去打汁，雖然1000YEN一杯果汁不算便宜，但看到它如此的足料，不得不試一杯! 另外加一串黑毛和牛同媽咪兩份食。
今日第一站是去大阪城，由日本橋上車，到長堀橋轉青色線到森之宮。其實好多個站都可以行到去大阪城，但我上年在T23站出站，離開時行到BUSINESS PARK站，兩邊都實在走太遠了，所以今次決定試一試森之宮站，因為地圖上看似不錯。
一出就見到少許少許櫻花，好開心呀^-^ 無諗過三月都可以見到櫻花，揀森之宮既出口係明智的!仲要行上大阪城都算接受到，一定比上年行得近。
叫呀媽幫我影有動感的彈起相，但預料之內的技術，哈哈。真的很喜歡外地的大公園，假日時和家人朋友小孩子在一大片草地上野餐聊天，比行商場坐餐廳還舒服呀!
見到小食車就知道就到天守閣了，除了食品外，還有日版的人樣素描及明信片買。明信片還可以立即郵寄回港。
剛巧今天有人在這個地方結婚，他們的衣著好端莊，不過我等了好一會也等不到一對新人，好想當場看到日本人的結婚儀式呀。
上次自己一個來的時候，天色完全沒有今天的美，今日個天就好似一幅畫咁，點影相都靚呀!
上次太遲嚟入不到天守閣有點失望，今日一早嚟終於入到了! 仲要係週遊卡的免費景點之一，太好了。
但我本人不太喜歡這座天守閣，感覺它只是一個外殼，沒有靈魂的外殼。因為除了外觀的城堡及頂層的觀景台外，其他地方都有華麗現代的裝修，內裡就好像在遊沙田博物館般的展覽館。我比較喜歡和歌山的和歌山城，在那木板上行走的EEE EEE 聲伴隨著古木味走是多麼的有感覺。
在地下的樓層有兩部天守閣金幣售賣樹，還可以即時刻字，我曾經在沖繩的水族館都整個一個類似的，金光閃閃好靚好鍾意，可以打名打日期真係好有紀念價值，所以今次都立即再整一個天守閣的版本。大家記得離開天守閣前都整一個作紀念呀。
2016年3月19日 DAY 5 - PART 3 大阪今昔館 -> 天神橋商店街 -> 道頓堀 -> 心齋橋
出示預約卷就可以直接重返今昔館去著浴衣了，不用再花錢買門票了。媽咪同我都好開心啊，估唔到可以用200YEN就可以著到件咁傳統既日本衫。
不過預計錯誤，我仲以為有個地方要除衫換衫，所以克意著左底衫打底，點知原來唔洗除，直接包上浴衣就見人啦，搞到自己有點熱。
在場會有幾個傳統的遊戲，媽咪正在用竹筒去求返支好籤。仲有唔知叫咩，又好似偷窺既故事睇。
成個館其實唔係好大，不過左影影右影影都夠玩一段時間。最重要是不用日晒雨淋，有冷氣又有景點，啊媽又行得舒服。
浴衣的背面有隻服務員親手打的大蝴蝶，所以影個背影都好靚。
玩完浴衣之後就落左一層去睇日本既變化。
E張好有呀信的故事既感覺。
玩完就已經2點3左右啦，又係時候食個遲來的午餐。我地去左唔知係唔係同香港同一間的元祿壽司到食一碟碟算的迴轉壽司。質數不太好，但每碟只是125YEN，十蚊港幣都唔洗，但質數一定高過香港的平價壽司，咁平食咩都抵啦!
在商店街看到一個唔知係咩身份咩用途的機械人，另外我地本來想按一按摩鬆一鬆，可惜要等....等.......等先可以做，真係有錢唔係大晒哦。
接著呀媽就返左民宿小休一會，我們再出發到心齋橋逛逛。相隔一年又來到同一個熱門地標，好有同老朋友相見的感覺。
新的廣告牌，由於同一個動作同一個概念，所以感覺同舊的差不多。
蟹道樂!! 今次行程太滿了，雖然蟹肉料理真的很美味，但老媽和我都曾經食過，所以就沒有安排到在此進餐，可能下一次再食吧。
路過一間室內釣魚的店，如果香港都有就好啦。
一整條心齋橋有數不盡的餐廳，仲要價錢都算合理，很可惜我們的胃只有一個。
牛角放題都十分吸引，但中午食的壽司已經食晚了，所以現在是半飽的狀態，也只好放棄牛角了。
最後我和老媽就選了一籣拉面，日本的一籣真的比香港的好食，湯底更濃半熟蛋更香。而在心齋橋有兩間一籣分店，大家不要去河邊的一間，最好去近難波的分店，只需要排一會兒就可以了，少人很多。
一籣的手信拉面都不便宜，但每次都總會買一兩包回家煮。
食飽飽就要快快SHOPPING!因為真的時日無多了，商店9時左右就會陸續關門了，作為旅遊區來說也太早了吧。
很想買這種TSUM TSUM手機殼，但男朋友說水銀危險不可以買 >~< 這個正版的比淘寶的美得多，好可愛呀。
路過了PABLO，又忍唔住要排排隊買TART。我地買左一個原味一個朱古古味，兩個都好好食呀，連我呀媽唔鍾意食朱古力既人都覺得好好味。
最後咩都關晒門啦，我倆都累了，就搭返地鐵返去民宿，用盡任搭的週遊卡﹗
Day 5 part 2 大阪今昔館 -> HEP FIVE摩天輪 -> NAMCO
食完早餐都差不多11點了，出發去盡用大阪週遊卡，任搭車同任玩指定景點。
而大阪今昔館是我給媽咪的另一個驚喜，我們可以穿著日式浴衣拍照。
在日本橋上車，前往咖啡色的堺筋線，到天神橋筋六丁目下車，下車後便可看到清楚的指示指導前往在8/F的大阪今昔館。
http://www.kotsu.city.osaka.lg.jp/library/ct/image000000500/subway_no_20131221.gif
進場前要把包包寄存在門口的LOCKER內，LOCKER使用方法就好像香港的泳池LOCKER，先投幣，用完後錢會退回。
而一進場是要立即去拿浴衣的小票，不過我們十一點的時段已滿了，所以只可預約2點的名額。想不到這麼誇張，所以我們立即轉戰另一個景點，下午才回來遊玩。
坐兩個站到T20的東梅田，先到HEP FIVE坐週遊卡包的摩天輪。
正文社的旅遊書會好清楚在地圖指示出口的號碼，實在太喜歡了，今次好清楚地知道要在2號出口出，出了去後就沿著抬頭看到的摩天輪走過去。
梅田真是個旺區，有好幾個商場，又有激安之殿堂，又有NAMCO，下次要安排一天來走走。
摩天輪在7樓，而7樓原來有好多美食，仲要有屎忽蛋餐廳，而日本的GUDETAMA CAFE都有一條小人龍，不過就比香港的短。
今期的STARBUCKS特飲不太吸引，所以放棄了。
出示週遊卡就可以免費上車了。
哇，車上有一個SPEAKER，可以連接手機去播歌，安排得太細心了。
車箱的不同方位都有貼紙介紹眼前的建築物及方位，好適合自由行的我倆，太太太貼心了。
到了最高點了，大地在我腳下。
早幾年已知道有一個商場是有一條大魚掛在天，估唔到就是摩天輪下的商場。而這裡又有一間DISNEY STORE，又有得買MISS BUNNY啦~
最後在梅田玩一玩NAMCO，想不到我媽咪都有收穫。
之後時間就差不多，要就返回今昔館了。
2016年3月19日 DAY 5 - PART 1 黑門市場 -> UCC CAFE
看到有BLOG友介紹黑門市場對面有一間UCC CAFE，而自己又只係在香港試過食UCC，所以今朝早餐就定在這裡了，好讓媽咪舒適地坐下食早餐。
不過朝早民宿下的黑門市場非常熱鬧，完全唔可以避而不見，所以我地又食了一食試了一試。
朝早的水果好新鮮啊，全眼都是士多啤梨，還有白色士多啤梨汁，不過今天我們不可以在食太多，因為我們要留肚去UCC CAFE。
最後我地只係買了一串神戶牛燒肉，就要和牛的牛味去打開一天的味雷!其實都唔平，要3000YEN一串，不過好在不用去神戶都可以一試神戶牛牛。
終於走出了黑門的誘惑了，到了十分易找的UCC CAFE。一樓是不吸煙區，二樓是吸煙的，設洗水間，11點前有早餐食。
媽咪點了一份三文治，雖然是簡單的食材，但它把蛋煮到剛剛好有少少流心，令到三文治都做到好JUICY。而我點了一客看似健康，但原來卡路里比呀媽的三文治還高的水果WAFFLE。另外一人一個熱咖啡，好香呀，晨早就是喜歡聞這種咖啡味。
2016年5月21日
一星期前有香港旺角信和中心二樓的旅遊渡假屋店，買了$240一位的金沙自助晚餐。金沙有分近漁人碼頭的或在氹仔內的金沙城中心，雖然金沙城中心會比較新的一間，但大家千萬不要貪新，要揀返漁人碼頭的888自助餐。而今次預先買是因為信和的價錢比較平，WALK IN 門口牌寫要298一位，要加一，但有賭場會員證有9折，但後面WALK IN的客人竟然要俾三百尾一位，職員說今晚是十幾週年的特別時段，款式比較多所以比較貴，但為何門口沒有任何相關的指示? 幸好自己一早在香港買了票，今日一蚊都唔洗俾，食完拍拍PATPAT就走得。
佢有兩個時段，一是17:30-19:30，或是19:30-21:30，由於我們要過珠海訓，所以決定食頭圍，但我地遲左半小時走職員都無趕我倆。
HKD$240全包的自助晚餐是如何的?作為自助晚餐必有的三文魚刺身有，而偶爾見到的蠔及蟹腳同樣是無限量地供應。水果方面更有香甜的蜜瓜，只是這幾點都已經值回票價，但它仲要有驚喜，就是竟然有羊架! 這個價錢又會唔會要排排排搶搶搶呢? 答案是完全寫意自由自在! 所以今次和我同行的朋友TINA都認同好抵食。
我自己試過食金沙城的LUNCH自助餐，竟然連三文魚都冇，而TINA就食過另一間酒店的晚市，三百幾一個人但都沒有金沙888這麼多款式。
2016年3月18日 [三月淡季7天𢹂母大阪京都遊]Day 4 part 2 大阪 -> BIG CAMERA -> 釣魚茶屋
食飽飽就差不多要起程去大阪，其實一直都唔明點解大家會話日本搭車好難搞同好費?!
你睇下人地幾清楚寫由京都去大阪要幾耐同幾錢，只要560YEN一個人就可以返去大阪市啦。
由於京都是一個好大的車站，所以大家一定要望清自己要在那個月台上那架車，如果不肯定的話就問職員吧，他們都會很樂意回答。
我們在JR的梅田站下車，再轉大阪市的地下鐵的M16梅田站搭紅色線去難波，再轉一個站去目的地日本橋。
梅田轉車時，指示不清楚，我們要在溝通唔到的情況下憑感覺到紅色線，其實路程很近，但當時人非常多，而轉車站時我們是需要走出車站行普通街路，自己又要拎住行李，所以都有點辛苦。
大阪地鐵的買票方法也是很簡單，還可以一買買兩個人，加上散銀的計算快而準，我每次都會把手上所有的銀仔倒進去，有多佢會吐出來找給我們。
日本橋一出就是黑門市場了，而我們的民宿是在黑門市場後面，都算是一個易搵的地點。
今次的住宿十分好，比京都那個清潔好多。加上床及廳可以任意打通，要空間感又得，要自己安靜地訓又得。另外洗水間及沖涼房是分開的，而沖涼位置有一部好勁的萭用抽濕機，配合洗衣機，每晚一抽成機衫第二日都可以著了。
小休一輪就去了BIG CAMERA睇玩具、電子用品同家品，見到一個適合我屋企副PUZZLE的木架，好想買呀，但太難拎返香港了，只好放棄。
今晚食飯的地方是我給媽媽的一次驚喜，同時都是我自己的一次放眼看世界。
在日本橋站6號出口往長堀橋方向走3MINS(正文社地圖的33號)，就見到釣魚茶屋。我叫它做釣魚餐廳，客人可以一到食飯一到釣魚，每拎一支魚竿連魚餌就200YEN，而釣到的魚會比自己散叫的魚平，每條魚可以一魚兩食，但要注意但凡有魚上釣，客人就必須付錢買了那條魚，不可放回魚池。
大池有的是鯛魚，如果上釣就2750YEN，點餐就要3600YEN。
呀媽準備開工，今次食魚定白飯就靠佢啦。
釣左5MINS都無，佢就有點心急同氣餒了。為了營造一個喜悅的氣氛，佢決定去鈎一袋螺，令自己以為自己好有成功感，哈哈~就係咁我地無啦啦有兩粒螺食。
我見今季有個限定小食，新鮮鮑魚，就叫左兩隻了，又唔貴，每隻只要580YEN。仲要上菜果時隻鮑魚仲未死，生生猛猛地放上明火炭燒的火爐上，就在我們打算燒鮑魚的時間，媽咪放在台上待機的魚竿轉了幾圈，媽咪還有少少不悅地以為支魚竿碌來碌去好煩，誰知這正是有魚上釣的一刻，總之一片混亂，不過個慼覺真是十分開心。工作人員聽到我們的聲音，立即過來幫手，佢地仲會問我地咩名，大大聲打鼓叫全場祝賀我倆。影完相後，職員會問我們想點食條魚，而我就貪心地叫了三食，佢又比我地咁樣做，而我地兩個都食下食下KO左一條魚。
我們還點了一客天婦羅及一碗好足料又平的魚湯(410YEN)給媽咪。
又玩又食完都只係用左7449YEN，真係好抵。細寶超級推薦大家來，不過大家來之前最好上官網訂一訂位先，因為都幾多人。
2016年3月18日 Day 4 part 1 - Porta地下街 -> Avanti -> 千房 -> 大阪
因為大阪的民宿要4點才可以入住，詢問了主人又不可提早寄存行李，所以我們決定在京都車站走走，才前往大阪。
晨早第一站是寄存行李，但京都站前的儲放箱都好受歡迎，幸好我們再走一會就見到暫時有空餘的大locker。開頭我們不了解借用方法，在劇院前看到locker但看不到鎖匙，還以為要在那一個地方租匙，後尾才知道有匙等於還沒被租用。
Locker旁有寫租用費用，只要把相應的硬幣投入，就可以鎖櫃及拔出鎖匙，如果沒有散銀也不用擔心，只要在旁邊的找換機打散便可以了。
早餐在車站下的Porta地下街食，食Lotteria快餐店，因為其他餐廳的早餐都不太便宜，而食物又不是太特別。但今日Porta又挺吸引，1000yen一個神戶牛牛的漢堡包，老媽說和老麥的漢堡差十幾條街。而我吃了炸蝦堡，只要380yen內裡有不少蝦仔肉，十分足料。
食飽飽又shopping，明明尋日才買了一個porter，但今日又買了一個Anello側背包，不過這個又輕又有拉鍊，我第一眼就深深愛上它了。
經過地下街好出名的面包店，在旅遊書也有介紹，曾經有諗過不就是一間面包店而已？！但聞名不如見面，它的面包果真有特色，又香，如果不是剛剛食漢堡食飽了，我一定會買一個試試。
行完地下街就上返地面，京都駅上方也有一個百貨公司，但價錢方面不太吸引，賣比較高級的東東。
不過在這間百貨外，有一個很好的位置可以清楚地拍下京都塔的外觀。
之後我地仲有時間，就行了去昨天Aeon路上的Avanti商場，沿著地下街走到京都駅的另一邊便到了。我地更買了三對鞋，執到寶的心情去買，因為一對堅係氣墊底的NIKE波鞋只要4000YEN，而我另外買左兩對好舒服的女人鞋，內有厚腳墊都只係二千左右，總之三對加埋都唔洗一萬。
午餐在Avanti商場的下層解決，仲要是哥哥介紹給我們的千房燒餅。慶幸的是原本打算在心齋橋的分店嘗試，但今天剛好要食飯時遇到京都的分店，還不用排隊？！立馬進去了！連身在香港的哥哥都說神奇。
我選了炒面味的燒餅，另外因為是套餐，所以有一杯汔水及沙拉。職員會把燒餅放在你面前，再撒上沙拉醬，然後打直切開幾份。本身以為沙拉醬弄成條紋好巧功夫，誰知自己一試就就到，只要保持些少力度，再快速地移動就可以了。
2016年3月17日 DAY3 part 3 四條河原町購物 -> 清水寺
係四條河原町有Disney Store，就係十字路口到。上下有兩層，仲要好多特價野，好多耳環手鏈介指都有買二送一/discourt，就咁就買左幾樣野，又成萬yen了。
行完Disnet Store就天黑了，轉攻百貨公司。這間百貨公司的門口好特別，保留了好復古的風格 。內裡有比卡超專門店，而當日不知有什麼特別貨品推出，如果要行比卡超店要排隊。
這個商場對面又有另一個OIOI百貨公司，內裡有Tokyo proter 專賣部。買滿一萬yen可以去二樓或六樓的櫃位退稅。
本來購物完就去夜祭清水寺，不過我和老媽因為網絡電力不足而失去聯絡 ，花了半小時玩捉迷藏-_-'所以搭巴士去到清水寺已經比較夜了，另外原來夜祭時清水寺前的店鋪不會開門，要是在媽媽這麼累的情況下，要她走上這條又黑又斜又長的斜路，確實有點辛苦，所以我取消了這個行程。在清水寺山腳的中華料理店食餃子套餐，留點腳力待續之後的行程。
在清水寺的旅遊區，食一個有飲品的便當，一百港元也不用，好平啊！
坐往京都駅方向的巴士回家了。 
民宿樓下正是便利店，立馬享受一支日本雪條。今次選用的雪條好有誠意，是日本糯米池味，仲要好有層次。先是冰層，再是糯米團，中間還有紅豆容，抵得推薦！
2016年3月17日 DAY3 part 2 祇園商店街 -> 錦市場 -> 錦天滿宮
四條河原町其實都夠行行食食足一日，佢有三個百貨公司，仲有新鮮既錦市場，又有個錦天滿宮仔參觀下，仲仲仲要有Disney Store，係一個條集燒錢同出血於一身既地方，同時亦是京都繁榮既一帶。
一落車就到大街，shopping的興奮感覺已經出來了！但我們先去進內街走一走錦市場，方向是非商場的那邊。
如果走對的話，會見到這個錦大字，裡面便是長長的海鮮美食街市了。
本想在錦市場找間餐廳坐下食海鮮，但走了一會兒，沿路可以坐下的食店少之又少，而掃街這個詞語又不可出現在媽子的世界裏，所以最後我們只是路過而已==''
本來怕媽媽走得太遠，沒有打算來錦天滿宮，但沿著錦市場找餐廳，找找下就突然看到了。
錦天滿宮的特點是門口的鳥居，鳥居兩邊是插了進民居的二樓。曾經睇無記十點半既森美小儀都有介紹過，當時仲好似係叮噹配音，好懷念叮噹把聲啊。
由於仲未搵到餐廳，我地就買左兩塊餅食。整餅部機好似當年百八伴food court既燒餅機，未排隊都嗅到好香既蛋餅味，其實好想買多幾塊，但驚食太多會食唔落飯。
食完塊餅就行返出大街，係Fujii Daimaru對面搵到間日式炸豬排專門店，有肉又有飯，仲要唔洗等位！老母一定歡喜啦！
自從上次和歌山食過一次之後，我就無再係日本食過炸豬排定食了。定食有不同等級的豬排選，而每個餐都會配無限量供應既椰菜絲、飯及湯。就算是十分肚餓的男人都一定會飽。
第一步，磨芝麻！
轉轉轉，好快就會有一陣芝麻香。之後就揀隻醬倒落去沾豬排食。
枱面有三隻醬，唔知係咩唔洗驚，佢有中文牌介紹。不過一場嚟到，緊係三隻都試試啦。
非常好的設計！把豬排放在鐵網上，有助去油。另外豬排真的即叫即炸，非常香脆。
2016年3月17日 DAY 3 - 民宿 -> 八阪神社 -> 衹園商店街
今日正式開始京都既觀光行程！今日天氣好好，個藍天靚到好似假既咁。
出門之前我先在民宿煮個早餐醫醫肚，雖然全部都係即食食品，但每一道都好吸引。
首先有好夠味既撈面，配蟹肉罐頭做小食，再有京都的小川珈琲，簡單但和風既早餐。
民宿旁邊是一所小學，出門時偶遇他們的小息時間，看到他們無憂快樂地和同學玩耍，其實和香港的小朋友無異，小伙子，盡情地享受你的童年吧！
本身仲驚巴士站會係好遠，原來樓下就係。由於唔同方向的巴士是在不同位置的車站上車，所以我附近仲有A B C 站，今天我們要前往的是主要景點，所以都可以很清楚地知道上車的位置是哪裏。我們今朝要去的地方是衹園，又剛好這個車站便是了。
多說說京都的巴士體驗吧！京都的巴士司機感覺比較忙，他們會配戴一組mic，為乘客作出提示，雖然聽唔明佢講咩，但都為他們喋喋不休的廣播給一個贊！除了實時廣播外，他們還要負責收錢。京都的巴士是下車付錢的，只要下車時把硬幣投進車頭的儀器便會自動找錢，我們這兩三天在京都市區的每程車錢是220yen，但今天我們買了一天的巴士pass，可以一天內任坐巴士。其實只要當天預計會搭三次或以上巴士，便有需要買pass了，因為一張pass只要500yen。而且購買的方法好方便，當天首次乘車時只要在下車時跟司機說one day pass再給錢就可以了。而第一次用時司機會把咭過一過機打個日期，同一天再乘車時，可以同樣把咭過一過機再取回，或是show一show俾司機睇個日期就可以了。雖然司機在望日期時感覺都未望清楚就可以了，好像過了期也應該不會發現，但大家都要有良知地做對的事，不要因為一時既貪心而破壞了人格。
我們搭了十分鐘左右就到了衹園站了。何解我會知道到站，主要兩大原因，一是巴士車頭會有一部電視，清楚地顯示下一個站名及最近幾個站名，二是巴士會直接在八阪神社前面停車，無論建築物或人流，你都會意識到到站了。
門口見到個必須影相的位置，見無人就立即幫媽咪影張，哇，八阪神社有，個門口又睇晒，加少少藍天做點綴，一流啊！
到我上鏡啦，當然係媽咪負責影，結果......只可以說幸好旁邊有四粒細字，不是的話也不知道這是那啊。
一進神社，有幾個小食店，好大支蟹棒啊,只需500yen好平啊！不過我有點飽，所以無食到。
過了小食的小店後，便到了拜神祈福的位置，先是寫牌仔的地方。 看到大家的願望，希望大家都夢想成真啦。
跟住就到祈福時間，我地兩母女都入鄉隨俗，先到洗手位置洗洗手，代表用潔淨的身體去拜拜，之後就到噹噹繩位，投入代表緣的5円，就是什麼都好的意思。之後就雙手拉一拉條噹噹繩，代表同神講話我到左了。再慢慢90度敬禮，代表對神既尊敬，而後就可以雙手合十許願，之後就90度再敬禮，禮貌地道別。
近日有夜祭活動，其實在相關網站都見到有花燈車展示，原先擔心路程太遠媽媽要太花腳骨力走進去，所以沒有安排此行程，但原來在大廟向內走五分鐘也不用便突然看到花等車，太喜出望外了。這4台火燈車比起文化中心的節日花燈美太多了！睇下隻龍個頭同隻手，再睇下白色狐狸人好似真係一個人坐係到咁，那種細緻同氣勢都勁好多！
去完神社後，我地就行一行神社前的祗園商店街，一家一家自家品牌的傳統老店，好喜歡這個老京都的感覺。仲見到老媽喜愛的kitty專門店，又見到老豆喜愛的伴粥小菜，又有幾家頭飾店啊自家零食店啊，小小小小又買左小小野。不過成條街都好難搵廁所，如果真係要去，就可以在八阪社社對出既便利店排隊去。行完之後我地就搭巴士去另一個京都熱鬧的地方，錦市場一帶啦。
其實只有兩三個站就到目的地四條河原町了，好多架巴士都啱。等車果時見到e個牌，好清楚咁講下架巴士去到邊，都幾方便。
民宿 -> Aeon Mall
偶然在香港都會去吉之島走走，這次發現在京都車站8號出口出，走五分鐘左右，就會到京都Aeon Mall。因為想買黑色返工鞋，又想安排一些有家庭用品買的行程給媽媽，所以一早便把這個行程定下來。希望可以有一些日本出產的、特別的、有用的家品買，而近期有有一張納米地氈很受歡迎，如果在吉之島有介紹就好了。
離開民宿後，天已經全黑了，而在車站旁的京都塔十分注目，所以在天黑的情況下我們也可以很清楚地辨別方向，不消十分鐘就到京都站了。
但因為今次要穿過車站到8號出口，所以我們在京都站正前要走落地下的商店街，沿路發現有屎忽蛋的扭蛋，媽媽興奮地扭了兩隻。
原來在8號出口都有另一個商場，但我們今晚心一意地向着吉之島進發！出了車站後向右行，看到一間豪華的大酒店及吉野家後便需要左轉，此時吉之島便清楚可見了。
進入商場後，發現原來和想像的大大不同。香港的吉之島是一個百貨公司 ，但這裏的是一個商場，內裏有一間間獨立的商店及一個超級市場。只可以說有電玩、餐廳、遊戲店、少量精品、衣飾店及鞋店，但完全沒有想像中的家品店。
SEBY仔的妖怪手錶牌牌只要300YEN就有十個了！
這款公仔在日本的確比較便宜，只是在普通商場的一個精品店款式已十分多了。
在2樓的鞋店我成功買了一隻返工用的黑鞋，只需要3900yen，仲要腳踏位有氈，不太重而個質地好軟好舒服，產品介紹還聲稱自己是透氣的，感覺像Doctor Kong 六至八百多質素！但現在在日本買只要二百多港元就買到了！
由於明天行程豐富，所以我們決定今晚在超級市場買一些面，明天早上煮來吃當早餐！同時既然來到日本，當然一定要吃日本的士多啤梨，真係又甜又平又正！見到有支士多啤梨醬好吸引，但雪藏的東西我怕會變質，所以沒有把它帶回香港。
日本的即食麵比香港多款式，價錢又唔貴，如果在SOGO買一個日本即食麵要廿幾三十蚊，但這裡只要＄10元左右就買到了，我還買了一盒蟹肉做早餐的配菜！
由於近期有叮噹電影上畫，商場配合電影的宣傳，拎護照的旅客只要用QR code拍照後，到地下的客戶服務中心便可換領一個袋，但我們吃飽了飯後服務中心已關閉了所以沒有換取成功。
今晚我們選擇了食迴轉壽司，價格方面大概是香港元氣壽司的價錢，但質素就高好幾級！他的魚湯及蜆湯都滿有誠意，只需二百多yen一碗，但用料十足。由於我們用餐時間都比較晚，所以迴轉帶上都沒有什麼貨色了，我們主要是落order為主，即叫即做十分新鮮，而且速度都算快。兩人結帳時大概此為二百多港幣，這個價錢這個質素十分便宜。
大阪關西機場 -> 京都 -> 民宿
到了機場後，我第一個動作不是去取回行李，意思走到地鐵站去買去京都的車飛。由機場去京都我真是第一次，加上今次有媽咪同行，所以要盡量搭不用轉車的鐵路，上網搜尋後一番後發現有一樣東東叫Kansai Area pass,2300yen一位，可以由機場直達京都， 價錢比搭巴士平少少，所以就買了兩套，比單買一程2850円的車票更便宜。如果下次我自由行，其實可以乜都買同一套車票然後先去姖路城神戶和歌山等地再到京都，因為這是一張one day pass。
除了在鐵路站買車票外，我還會到了機場離境大堂的客戶服務售票處，買了兩套大阪周遊卡，這是一張3000円兩天用的pass，兩天內可以任搭地鐵，更包一些景點的入場費，買的時候更送了一盒百力支給我們，在大阪搭一個站地鐵都要二百幾yen,所以這套卡都挺抵用的。
出發去京都，而用PASS的話就直接俾車站職員望一眼就可以入閂，如果這次是即日的第一次乘搭，職員會在車票邊打一個小圓日期印。
今次又有搵日本鐵站APP － 乘換NAVITIME幫幫手，又可以清楚地搵車搭。這個程式真係好好用，佢所顯示既上車月台同時間都好準，而時間下面乘換幾多回既意思就係表示要唔要轉車及轉車的次數。到了月台望望板，又望望APP，就確認了16:16的車才是我們的目標。
在等車的時候見到一部雪糕機，味道比香港多而且價錢更加比香港便宜，所以又買了一個試試，但由於味道太多，選擇的時候十分困難，最後選了一個季節限定的味道，結果都好好味啊！
但搭這些鐵路的時候要留意，原來它是有分自由席和指定席，當然我們買的只是自由席的票，沒有配給的座位，所以上車前記住排啱隊，然後手快有手慢冇。今次我們不知道，排了在指定席，結果上車的時候花了一些時間回到自由席，導致位置都差不多被搶光了。幸好媽媽找到了一個座位，而我就在行李格附近站了大概半小時，才有乘客下車而有一個座位坐，如果沒有位的話，便要站一個多小時才會到京都。
今晚開始不是住酒店，而是住民宿。這次亦是我的第一次在Airbnb租住民宿，詳情另文介紹。
安頓了行李之後我們便出發到Aeon Mall購物和吃飯。
Hotel Nikko Kansai Airport -> Rinku Premium Outlet
因為要配合返CHECK OUR同CHECK IN 既時差，所以今日去京都前就加個OUTLET行程。先安穩地把行李寄存於酒店 ，再移動到機場出境大廳堂的樓層去搭巴士。前往Rinku Premium Outlet的旅遊大巴在12號車站，而收費是200yen。每小時的10分及40分都會有車。而旅遊巴會先去機場的其他地方，總次佢會過條係大海上面既橋，過完之後只係得一個站，果個站就係啦！
到站後影埋回程既時間表，回程既話就每小時既05同35分有車。
好多人介紹話一到步就去客戶服務中心，憑護照拎一本優惠卷。
另外仲有兩層OUTLET既FLOOR PLAN，大家可以先留意下有無心儀既品牌。
Coach既價錢真係好吸引！點解可以做到打完5/6/7折後再有7折？！ 不過大家記住拎職員派果張優惠卷先有再7折，記住拎完先去埋單啦！ 
其實佢既classic款配粉色系列真係幾靚！
另外仲有令一眾師奶著迷既重奶奶餐具！但2500yen2件真係好平，仲要唔係水尾，好多色揀啊！
9700yen一套既茶壺套裝，本來我朋友想買來結婚，但當時香港開倉無鮮紅色，宜家e到就咩色都有啊！
另外一樓仲有GAP，買滿10000YEN有折扣，就算無折，一件GAP招牌式既外套只係2400YEN，而大人TEE只要7X港幣。我仲買左兩條長褲，好鍾意啊，因為大脾位完全唔窄，而且長度又剛剛好，唔會好似香港既牛仔褲咁永遠都要俾人改短先著得。
二樓有個影相位，可以望到好大個既摩天輪，仲有個相架可以影纪念相，影出來個效果都幾得意。
本來想去二樓既運動店買運動鞋，但價錢唔係特別吸引而且款式又唔算多，所以無收獲（反而之後係京都的ABC MALL買到）。
我地行行下就行左兩三個鐘，又係時候醫下肚啦。
成個OUTLET二樓有幾間餐廳，而一樓就有一個FOOD COURT，本來我仲驚餐廳貴，所以落左去FOOD COURT食，點之原來兩者係差不多，但我怕呀媽累了，所以到左FOOD COURT就食啦，無再上返二樓啦。
FOOD COURT又有廁所又有水機，不過食物就一般般啦，應該二樓的餐廳會好吃點。不過我平平地叫左碗牛肉喬麥麵，對於一碗六百幾YEN既面來說，佢都幾足料，食極都有牛肉。
簡簡單單食完一餐就去COACH打多一轉，因為搭三十五分的巴士前還有時間，但在日本買野大家都要留意，如果買滿一萬蚊以上要退稅的時候，大家一定要預多一點時間，因為當地職員的速度真的非常日本人，完全有條有理不着急。
最後兩母女拎住大大小小的購物袋，回到早上下巴士的地方，搭200yen巴士回機場，為出發到京都作準備。
2016年3月16日- Day 2 part 1 Hotel Nikko Kansai Airport -> Rinku Premium Outlet
尋晚都成兩點先訓，本來想訓晏少少休息下，但酒店早餐時間係05:30～10:00，所以就同返工時間差不多地7點半起床，8點左右落去食。早餐嚟講佢有個好吸引我既selling point,就係佢上至碗碟，下至食材都係全日本制做，感覺好鬼健康！
今次既早餐又係有6/9格既食盤，我拎左一次6格，每格放少少已經夠夠地啦，但我媽子好勁，佢早餐都可以食到好似晚餐咁！連拎兩次9格盤！
好多菜都有一個介紹，令到成件事吸引左，普通一撻玉子，宜家就叫夢想丸！
推薦e隻橙汁同番茄汁，因為佢話自己係100%無添加，另外完全唔水稀稀，味道又夠濃，正！我揀左飲佢之後，完全無掂過左邊果汁機既普通果汁。
我的第一盤！
每次係日本都好鍾意食佢晚沙律菜，佢真係好綠好靚又夠爽，就算肯俾錢係香港買日本沙律菜都食唔到果種新鮮！而今次仲特別，佢係校院內種植既菜。 
另外 佢有一盒茶包俾客人任飲，全部都好似好吸引，最後我揀左有我男朋友個名既茶包飲，個名改得咁好一定會好味！
入痤時有一塊咭仔，就係俾其他客人知道張台有人佔領左，而食飽飽後就可以反轉個牌同人講佢地可以坐啦！
返房執行李閃人期間，見到餐廳仲有takeaway coffee飲，welcome drink就聽過，但拎得走既又第一次聽！
一望出房就見到機場，總括來說好好既日航酒店體驗，一千住一晚都值得！
2016年3月15日 - Day 1 香港->大阪關西機場->Hotel Nikko Kansai Airport->Lawson便利店
每次自己有少少成就就會藉口奬勵自己，新年後考車1take pass成功，緊係嚟返轉日本旅行啦！
較早前買了機票訂了酒店後，便一直慢吞吞地計劃行程，拖下拖下就三月中啦！
其實今次旅程去七日六夜，但實質只有六天，因為第一天晚上才飛大阪，十一點多才到達大阪關西機場，而今次我的旅伴是我媽媽，為了大家的舒適及有充分的休息，第一天的晚上我訂了關西機場的日航酒店連翌日的自助早餐。本身以為不太便宜，但這個方法原來比買第二天早上的飛機更便宜！
其實一直都唔可以拿捏到幾點去機場會比較好，今次6點半機，我地已經3點出門，點知排完check in同排完過關就已經5點2，仲要一定要食飯，因為坐廉航hkexpress無野食，仲要碌去好遠既Gate206，真係有少少趕。所以我決定買外賣去閘口食，可以易預時間又可以睇住班機既情況，成件事有少少趕但慶幸媽子心情好好竟然無嘈我，不過聽嚟下次要再預早少少啦。
另外寄行李方面，hk express真係好過粉紅色桃。因為hk express係以重量去計，所以我只係加左一個人錢25kg既行李，咁就照寄兩件。如果樂桃就可能要細行李箱放入大行李箱再寄，因為佢每加錢只可以係一件咩咩重量以內既。
今日好好彩係香港航空既機唔係快運機，其實我無睇個數據上兩者有咩唔同，但心態上一定會良好少少！班機都好多人，不過咁啱我地旁邊無人，咁就可以兩個人坐三個位啦！ 
另外驚媽子頂唔順餓，所以買機票果時訂左客焗豬扒飯俾佢，開頭見佢個meun見即訂都係$60，唔明一早有咩好，原來會送多一支水，咁都好既，可以濕下喉。不過碗飯好細盒，完全係小朋友份量，好彩上機前食左野，如果靠佢就唔得掂啦。
今次係第二次同媽子去旅行，而媽咪仲用緊我係台灣買俾佢既passport套，好有價值又好靚既手繪套。
18:30起飛，日本時間22:50到步。三個幾鐘機，除左玩手機，仲睇下機上有咩買先。
好似幾吸引！不過去日本一定有更多野買！所以又望下好啦，唔買得住。
另外想講，唔知係咪廉航既關係，所以個個位既書都好舊，其實真係唔係好想掂本書，不過女人對shopping又有種神奇既魔力，所以我先有睇，但真心想知佢幾時會換一本呢？！
左三右三既格局，而好想強調香港人廣東話既空姐真係好親切。
到左大阪啦！
好似同上次個機位差不多，都係要坐無人駕駛去過關。
過關前一定要填申報資料表，而拎完行李後又要交一張隋身物件既聲明表。前者一人一張，後者一家一張都得。我見好多人地址都空左或是太簡單而被打回頭再填過，所以大家記住填多兩粒字，就算唔寫晒都好，有樓層有號碼都似樣少少。
過關果時要打晒兩邊食指指紋，又要影相，不過過程中有圖片說明，所以連我啊媽都理解到！
跟住就直接跟住指示去2樓check in!
中間會經過地鐵站，一出去就感受到八度既天氣啦！不過都接受到！
過完條橋就到啦，其實機場附近都見到有AeroPlaza既字眼，但又唔見百貨公司蹤影，之係點呢？
酒店樓下有兩間Lawson便利店，又有24小時既burger King，一定唔驚餓啦！
3月頭係日本既女兒節，所以有幸見到成台女兒節公仔。
房匙係一張好似mario kart既遊戲咭，另外兩張早餐卷。
放底行李就落Lawson買宵夜，日本既便利店真係一個勝地！
今次見到既限定Haagen Dazs雪糕，不過夜媽媽食太heavy啦，所以無食。
買左限定既櫻花starbuck，230yen一個，有士多啤梨果肉，飲落都接受到，無咳藥水味。 但我另外買藍莓汁就好味過佢好多！
加舊明太子飯團（162yen)頂頂肚，明太子真係好鬼正啊！ 另外仲有個特大布丁，勁飽！
好耐無住過日航e類咁靚既酒店啦，廁所既配套好好，連頭cool洗面既都有！最令人滾動既就係佢竟然有放濕機！係人都知酒店抽到人都乾，但從來未見過咁細心有部放濕機！真係加晒分呀！
我一直以來都希望把每段旅程記下，除了近期的廣州兩天遊之外，幾段旅程都隔了一段時間才把旅程記下，所以通常內容都不夠詳細，很多交通及細節等資料都被省略。由於種種原因（應該是懶惰比較多......）吧，結果博客由開心share變了單純的回憶記錄。而三月份我會和媽咪走一轉日本關西，今趟旅程我決定每日都會把部分有用的資訊認真地記錄下來，務求除了開心share至外，大家還可以跟着我的文字去旅行。
有這個轉變是因為我自己在每次去自由行之前， 都一定會參考五湖四海的blog去組織自己的行程，每當看到具體及有用的資訊時，都會認真記下來作旅程的參考，而旅行途中往往會因為在陌生地方遇到這些曾經在網上見過的道路而產生一種踏實的感覺。
將心比心，我自己都希望除了把旅途中的喜悅分享之外，大家還可以利用我的資料作參考，令我的文字變得更有價值,我要加油呀。
2014年4月15日 - DAY 6
酒店 -> 環球影城 -> Saizeriya薩利亞餐廳
今日係大阪既第2日，先下定決心放棄週邊既引誘，全日去人生第一次去的環球影城。
先從長堀橋搭地下鐵長堀鶴見緑地線往大正方向，再轉環狀線去西九條，再轉去櫻島方向，但在Universal City站落車就到啦。其實去到大正之後，一定會發現一組組都是去影城的人，所以只要跟住人流同好明顯既指示行，就好快會到。
一到嘆咖啡一到行去樂園，一副好心情啊(同時要堅持唔好俾周遭既商店吸引，要先去樂園先玩呀)！
哇，環球影城永遠的地標出現在我眼前呀！識轉既實物呀，唔係圖片呀！心情真係大好呀！
由於係香港銀行中心買左入場劵，所以直接可以持票入場。
一入場既感覺同海洋公園差不多，都是一條值得血拼的假歐陸式大銜，不過只可以望一兩眼，唔可以買住，我要輕輕鬆鬆兩手空空地玩！
行兩行就見到4D劇院，今次是播ELMO，總感覺一個以影城為名的樂園一定會是一個欣賞效果的好地方，所以立即入去睇啦！
來之前友人推薦SPIDERMAN，估唔到真係真係真係好正。完全睇唔到佢既路線係點行，因為佢有好多好震撼既4D效果，明明係平地，但又好唔平既感覺，成個故事又好有連貫性，好似真係入左電影入面咁，俾壞人用槍射果下真係好似向住自己射咁，係天空到飛果下都有少少坐過山車的感覺，堅係正。因為太正了，我前後玩左兩次，但都睇唔清佢既路線。
另外我今次一個人來玩真係好爽，因為可以排SINGLE CUE，令到我玩每樣野都好快，越過打蛇餅的人龍，等了五分鐘都沒有，就可以玩了。
另外有玩大白鯊，坐船仔。
過程中不可以拍照及攝影，不可以留下紀念的照片，但都好，這樣大家都可以用心用眼去專心欣賞週遭的環境及表演。
而且這個樂園是以日文為主要語言，無論劇場的真人表演或是船河的介紹，都全日文，不設另外的選擇。雖然令到我既投入感大減，但我還是十分支持這個政策，因為可以令到我覺得自己在一個充滿日本文化的日本地方，而且這也是日本人支持自己文化愛自己文族的表現。反而我不喜歡香港的樂園，明明自己是香港人在香港地遇到香港人的職員，但第一句聽到的總是普通話的問候，太沒有意思了。
還有幾天就是復活節了，連ELMO同COOKIES都換了兔仔LOOK，仲影埋一個可愛既日本小朋友，唔知係佢自己鍾意ELMO，定佢媽咪鍾意ELMO呢?
大阪的環球影城有兩位只是大阪才有的吉祥物，就是細細粒的粉紅色芝麻街怪獸同HELLO KITTY！
我宜家都有點後悔沒有買一個粉紅怪獸紀念一番。
在KITTY時尚大道的KITTY小食亭，價錢都算合理。不過我午餐去了HOLLYWOOD街的型爆跑車餐廳食漢堡同粗薯條，所以已經唔餓了，沒有買到個KITTY豬頭食。
玩左一陣就開始行下唔同主題的手信店，小朋友的公仔TEE都唔貴，另外質地都挺不錯。小朋友著左應該好可愛又好有型。
另外有好多小食鐵盒都好靚，我自己買左一個細細個的KITTY盒，但之後又見到這個以PARADE為主題的又好想買，但屋企的空間有限，所以就影張相代替買走。
不知不覺就由朝玩到晚了，趕快找一個坐位坐下來，一邊休息一邊等燈光PARADE。
正巧身旁有一個日本的老婦人，她見我自己一個人就和我聊了兩句，後來她還請了我食一粒糖，好有愛的感覺。
ELMO是第一個出場的卡通，同時我覺得它是全場最靚的燈車，其後的KITTY塊臉用了粒粒燈，又有出水痘的感覺，哈哈。
魔法老婆婆施魔法了，媽哩媽哩空！
這隻不知名/沒有名的大象都好靚，有一種THAILAND STYLE。
睇完PARADE就走了，還沒食晚餐的我就去了外面的Saizeriya食。平時在香港都經常食，因為平，而在日本它都是同樣的便宜，一個焗飯只要299YEN!要埋隻日本半熟旦都只是368YEN！
而在香港的時候，我經常表示它的湯份量好少呀，就好像人家飲了幾口的感覺。今次我克意叫了同樣的湯，看一看日本的版本，想不到情況同香港的一樣，剛剛到的時候就少得可憐，只可以同自己講一分錢一分貨。
在回酒店時，又不幸地經過一間藥店，又敗家了一堆零食，真是比香港平好多，好難忍手唔買呀！
2015年12月14日 - DAY 2
星驛國際渡假公寓 -> 萬寧廣場 -> 上下九步行街 -> 銀記粉腸 -> 蓮香樓 -> 香港
朝早起身就落樓買早餐，晨早有咖啡飲真係好幸福，我地仲去埋萬達廣場的華潤買皮蛋廋肉粥食。
食完就出發去行街啦！
一番打聽之下，原來我地樓下有一間公車去到地鐵站，仲要幾平，每位只需兩蚊，反觀尋日係長隆搭的士要收40蚊人仔，真係貴到呀媽都唔認得。我地直接搭到去尾站 - 廣州南站，咁就直接轉藍色線就去到我地要去既市中心地段了。
等車期間拍下的紀念照，我們一行4人昨天就是住在左邊的大廈內。
我地先去藍色線的海珠廣場站，B1出口出去批發廣場 - 萬寧廣場。今次是我第3次來，今次感覺文具比從前少了很多，而且價錢沒有從前吸引，是否因為淘寶的存在而令商店網絡化了?
行完之後我地就去最尾一個行程 - 上下九步行街，本來為了方便，我地就搭的士去，因為預計五分鐘左右就到，可以係街頭落車，落完就沿行人路食銀記同SHOPPING，順路就到酒樓食埋野之後轉個靚彎就到地鐵站，點知塞車塞到呀媽都唔認得，我地木根本未到就落左車啦，之後行左幾個字先到步行街，攰死啦。
其實步行街有好多小店睇，但我地因為唔夠時間，只可以走馬看花，但我都好開心用99蚊人仔買到件幾靚既黑色外套，下次再來一定要預返一定的時間。
好快我地就見到目標餐廳 － 銀記腸粉店，其實一直搞唔清佢係叫腸粉定粉腸，不過我真係佢既BIG FAN！我每次來廣州都一定會尋覓銀記，仲記得有一次我發現附近有銀記，我拉埋男朋友放棄旅行團的自助早餐，行左成十分金鐘來食腸粉。而我每次一定叫的便是蛋腸粉，雖然佢係平貨，只值6蚊，但我真心覺得佢比18蚊的鮮蝦牛肉腸好食N倍。而且廣州腸粉的原因是它的皮比港式腸多同薄，真係好好食。
食完腸之後我地再跟大路行，搵一間廣州老字號 － 蓮香樓。不過我地一見到既只係一間手信店，我仲心諗，唔通上網介紹位於上下九的蓮香樓只係一間手信店? 路在口邊，問一問店員，原來食飯的地方要再走100米。不過來到手信店，就逛一逛啦。見到一個好靚的鐵盒，封面是有少少立體感的蓮香樓牌坊，價錢都不貴，可惜內裡是杏仁餅，家中澳門的杏仁餅還在，所以放棄了，但買了一盒蛋卷，雖然鐵盒不夠吸引，但內裡是獨立包裝，每包有2大條，又幾好食，唔錯唔錯。另外買了幾舊不同種類的中式餅，一開始我們都以為買夠幾粒就有盒，但原來個盒要俾2蚊一個，不過都一定要買，唔係既話我驚返到香港變屎餅。
最後一個行程就係食蓮香樓飲茶了，剛剛趕到佢4點的LAST ORDER。佢分三層，地下同樣是手信店，而二三樓都是一個飲茶的地方，二三樓點心的種類及價錢是一樣，但飲茶方面就有一點不同。三樓就5蚊一位茶，飲的是和港式酒樓一樣的茶壺，而二樓就係有一組茶具在台上，價錢分別有8/12/20不同選擇的茶，我地幾個後生對茶一向都唔講究，但又想一嘗茶具的樂趣，所以就叫左8蚊的茶。揀完之後待應就拎左4小包全新的茶葉來，先折一包，再幫我地洗一洗第一轉茶葉，原來每次倒水落有茶葉的細茶壺後，就差不多立即將茶例去無蓋的小壺，再添茶給大家，好特別。
點心方面，本來上網見到大家一致好評個上湯蝦餃，可惜今時今日這個點心已下架了。我們盡量叫特別一點的點心，先來一個炸羅白糕，幾好食。再來一個完全不好食的薄餅，我以為會係好似平時食白白地黃黃地一塊好薄的餅，點知上左幾舊好油膩的油炸鬼般的小食來。我地仲叫左一碗廣式粉仔，佢好似一條條蟲咁，但食落又夠汁又唔粉，幾好食，唔知仲有邊到有得食呢?
之後我地好辛苦地搭左一小時地鐵去最近碼頭的地鐵站，下班時間的地鐵人非常多，而且大多數人都沒有依線排隊的意識，不喜歡不文明的社會呀。
我地一直以為是坐1820的船，為了趕船，我地6點出地鐵是更大膽地坐上電單車去碼頭，不過好可惜原來我地架船是1800開出....OMG，第一次遇到這樣的情況，碼頭都關了燈，而附近都是一片荒蕪，碼頭職員都下班了。如果要返市區又要一小時，最後有一個大叔話CNY550車我地去深圳，要個半小時左右，要不就CNY70車我地去廣州市區，再轉直通車返香港。但我怕用便宜一點的後者，我地天黑都未塞完車，所以就揀左前者啦。但意想不到原來由廣州返深圳，1小時40分鐘左右就到了，果然不走虎門的話就快一點呀。多謝好辛苦咁撐住唔訓，幫我地回程時留意安全的男朋友仔，畢竟4個人坐上了一架陌生人的車，危機意識一定要有一點。
就是這樣，我們衰收尾的2日1夜就完結了，好感激碼頭職員老小姐的幫助，更感謝同行朋友的大量，她們完全沒有埋怨，LOVE YOU^^
2015年12月13日 - DAY 1長隆歡樂世界 -> 星驛國際渡假公寓
蓮花港專車只係車到我地到酒店門口，如果要去歡樂世界我地就要自己行十分鐘左右去返樂園既北門入口，沿路除左要係車路上面行外，仲要行條天橋，而落左天橋就會見到一個無人既售票處同大馬戲個入口，過左後再走入少少就到長隆歡樂世界了。
十一時左右，明明今天是週日，但門口完全不用排隊，是我們到得太晚嗎?
來到陌生的樂園，當然先望望地圖同表演時間表，樂園有條推薦路線，但我地冇跟到，全程交由同行友人 - ANNIE安排。
先來玩左幾個熱身遊戲: 墨西哥草帽 -> 飓风飞椅 -> 碰碰车 -> 音乐船，幾個都係吹吹風好輕鬆的遊戲。
熱完身我地就玩左個U型滑板，佢係香港迪迪尼既進化版，除了U字走外，佢仲會自轉。玩果時我有幾下都唔敢開眼，有一次諗住開眼睇睇啦，點之果下成個人打斜咁係個天既唔知邊到，哈哈，真係藍藍天空高掛我的夢呀。
哇，玩完之後個靈魂好似仲掛左係個天到咁.... 不過正所謂一鼓作氣，再加上惡魔ANNIE既推動下，大家就移步去十環。上十環前我果心仔都幾忐忑，又怕又想玩，仲要等既時候有廣播話有客人玩樂後嘔，咁自己又頂唔頂得順呢??? 哈哈，同朋友SHERRY兩個勁嘈，又係到整緊條鞋帶，又係到好似想縮沙咁，好搞笑。最好兩個都有上到去，真係轉轉轉，再轉轉轉，不過玩果時原來佢係好似扭紋糖咁轉，仲要轉幾個圈又行兩步先再轉多幾個圈，又冇想像中咁恐怖，暫時感覺U字仲可怕。
玩完之後，我地再沿條尖叫地帶玩龙卷风暴，佢有點像AIA果個洗衣機，不過佢係會高空同底空都克意停一停，反一反，轉一轉。當佢轉到上天，成個人反向地果時，真係成個PATPAT係掂唔到張椅，成個人係100%依賴晒條安全帶去兜住個人，不過係我有點怕既同時，坐係旁邊既ANNIE話最恐怖係E個，一到玩一到叫，搞到我想驚都變成覺得好鬼好笑。
好可惜，玩完之後發現旁邊係摩托过山车，但正值年度維修所以無開，真係好可惜好可惜好可惜呀，我最想玩既過山車呀。
我地今日玩好多遊戲都唔洗點排隊，真係估唔到星期日都咁少人，但歡樂既時光好鬼快，玩玩下又到一點幾，係時候醫下肚，而我地走左幾間快餐店後發現係龙卷风暴附近的飞轮汉堡屋是最便宜，CNY40一個漢堡+粗薯條+飲品。
食飽飯後ANNIE就安排左幾個輕鬆少少既遊戲俾我地玩，就係我地行緊去5D星际决战期間，我見到一個我係深圳歡樂谷玩過既緊湊又興奮既救火英雄遊戲，就係2人一車，5-6隊一齊玩，要一上一下地推架車去另一邊，再要把火勢撲滅，再原車返起點。成件事真係係千鈞一髮既時候發生，我地玩完之後笑到傻左，甚至我地宜家返到香港，每次自己一個諗起既時候都可以忍唔住笑左出來，真係不得了。
之係我地睇埋場特技SHOW，一去到覺得個場景同環球影城好似，雖然今次有玩地面既飛車特技，但我比較鍾意後者。而有樣幾奇怪既野就係個配音，明明眼前個個西人演員，個個都開緊個口講緊野，但配既音就係正宗既普通話，其實成個畫面好唔和諧。
睇完SHOW就去左坐一個矮小的過山車 - 飞马家庭过山車，一到玩一到呆望住附近的垂直过山车，蚊比同牛比的感覺，就好似企係長洲渡假屋而抬頭望住座商業大廈咁，仲要有架車係上面好似跳樓咁跳落地，真係好恐怖。本來ANNIE叫我地過去玩，但我同SHERRY都唔敢呀。
係我地仲思考緊玩唔玩垂直既時候，我地經過森林神庙，就入去打左個轉，不過真係一個零意義既設施，大家可以唔洗去玩呀。
之後我地返左去哈比儿童王国，玩左個好得意既架空雙人單車 - 快乐干线，等玩果時見到人地玩得勁慢，仲一到玩一到食薯片玩手機，就好似係屋企張梳化咁。
之後突然見到架大人都可以坐既圈圈船，好得意呀，好依稀記得細細個去香港既唔知邊個樂園，入口附近有一個比E個大既圈圈船，但之後再去就再無見過E個設施了。今次再玩真係好開心，不過如果佢可以玩得耐少少就好啦，勁快玩完。
路過就玩下攤位啦，我地玩左掟波波，掟飛標同肉酸青蛙。佢既攤位真係好搞笑，大家見唔見到下面張收費表既圖有咩問題?
我地仲玩左個人如其名的超级大摆锤，佢真係好大個，每次好多人一齊玩，而且玩果時好涼好舒服，但最最最最最大問題係坐落去之後，兩邊頭既保護膠奇臭，明顯是古人們的汗水味，真係好惡頂，本來sherry想玩多次，但我真係頂唔順啦。
最後最後我地又係到諗玩唔玩垂直過山車，天都黑啦，再唔玩就真係走啦。今次本來話玩既ANNIE話唔玩啦，而本身話唔玩既我就開始心血來潮想玩。因為驚下次再來既時候，健康上已經玩唔起啦，又加上好似來到長隆，如果無玩過垂直真係好似好差少少咁，所以我決定玩啦! 最尾三個一齊玩，其實真係好驚，因為架車一出發就升上去，而升既時候真係會感覺到係上到好好好好好好好勁高，望出去係同附近既高樓差唔多，而佢衝落之前會停一停，成排人面向下，好似準備跳樓咁，而一垂直完佢會立即轉一個360度既大圈，其實個過程好快，但真係好驚，來回地獄又折返人間既時候，其實個靈魂仲係地獄。
玩完之後我地就好滿足咁走啦，我地走果時仲剛剛見到2隻大象落貨車行入馬戲團，都幾臭。
係長隆打的架架都唔跟咪標，個個開價一開就40蚊人仔，真係好衰，後尾迫於無奈搭左架CNY30去附近的萬達廣場返酒店。
今次住的地方是星驛國際渡假公寓，在萬達廣場上方，在星巴克上方的公寓大廈內，只有一層。雖然規模細，但酒店好清潔，又好平，都唔錯，間房又大，兩張床就一張雙人床一張KING SIZE，但朝早就好清楚聽到附近既聲音，隔音方面就唔太好。而CHECK-IN果時就要俾CNY200按金，幸好我去旅行一定會預鬆動的現金，所以完全沒問題。
而飲食方面都幾方便，商場三樓有好多林林總總的餐廳，但同行朋友話要睇台慶，所以就買外賣上樓食。
