其實自己由出世到宜家廿幾年,都真係幾幸運,因為除左出世果時係手術室出現過之後,都只係試過偶爾暈下去過醫院,但就真係TOUCHWOOD TOUCHWOOD地未試過開刀做手術。
話說自己十二月中果時洗牙順便照埋張X-RAY,因為兩邊有兩隻智慧齒一直都打橫生,而且近日卡住食物既問題日益嚴重,所以有意拔走隻牙。但當時屋企附近的牙醫聲稱因安全問題,所以要求我另覓牙醫去處理。本來自己都打消左年終前拎津貼拔牙的意念,因為短短一星期應該冇可能預約到,加上放完大假都冇時間再放假去約。點之就係2015年最後既一個星期二,我老闆突然早左放我走,而且又剛好問到個同事介紹佢個牙醫俾我,而又咁啱一打去預約又立即有位,天時地利人又和,真係整定係今日啦。
其實今次真係膽粗粗就走左去旺角,去之前都有幻想過成個過程係點,聽到同事既形容真係勁怕怕,仲會好百痴咁諗,如果流血不止既話會點呢?旺角既醫生會唔會好似拍戲既無牌診所咁設備好簡陋呢?
好快就上左去診所啦,間診所雖然是樓上診所,而且面積唔算太大,但侯診既環境好歐化好舒服,大梳化假火爐,仲有唔同既相同獎狀,同心目中既''旺角診所''真係好唔同,反而有一種令人放心少少既感覺。
由於今次決定得有點突然,所以男朋友如常地在工作,自己一個人又有少少擔心有事點算,所以入去之前都有同呀哥WHATAPP一句,同時將牙醫的資料傳送給他,感覺有咩事既話家人都知我係邊到出事。
等左五分鐘都冇就到我啦,本來我想拔蛀左少少既右下智慧齒,但牙醫話隻牙太入,要另一位牙醫在另一間較大的手術室處理,但那位牙醫剛好沒空。當時自己唔知那來的鬥志,好像一場來到事必拔走一隻,所以就叫牙醫幫我拔左下的智慧齒,牙醫望兩望就話應該可以,就係咁簡單,手術就開始啦!!
同事bella同我講佢當時打左兩三次痳醉,之後一個後生的女牙醫用了差不多40分鐘去拔牙。
今次我遇到的牙醫是位中年的男人,原來他是女牙醫的爸爸,爸爸說通常智慧齒都會交給女兒處理,因為每一個都是女兒學習的機會,但今天剛好女兒沒有空,所以他才親自處理。依稀記得bella話個女牙醫好似唔夠力拔牙,所以今日聽到牙醫爸爸會親自拔牙,感覺好似比較靠譜,真興幸牙醫女兒沒有空呀!!
首先打左一支針,仲以為會好痛,又唔係痛,感覺支針好幼細,而落痳醉果時又冇咩野,好快就開始庳了。
我都唔係好知佢係我個口搞咩,但聽到的聲音都挺恐怖,好似一個鑽地工程係我個口到進行中咁。佢好快叫我吐一吐水沖一沖口,吐出來的水已經有血了。
雖然唔痛,但完全聽到同感覺到佢拉扯隻牙出牙肉的過程,佢雖然是一個大男人,但都好感受到佢要好用力先拔到隻牙,而拔到之後因為另一隻牙阻擋了,所以又花了少少技術才真正移走隻牙。最後就係用線連左兩針了,同時都是我人生第一次連針,那一刻嘴唇感受到佢條線,成個人好驚,心跳得好快,仲恐怖過玩長隆過山車。
其實個牙醫爸爸好好手勢,15分鐘左右就整好,但唔知係真係失左血定因為太驚,我一拔完之後暈到落唔到床,訓左一陣先可以行到出大堂等拎藥。而係等待的過程又好暈,冇咩力咁。
本來想等男朋友接我,但要等太耐了,所以見自己好似好左d就決定先返屋企。
就係搭車期間,又突然唔係好舒服,好彩有個位可以坐一坐。但個人應該唔係好清醒,因為到站都唔知,仲要落車果時連個好重要的手提袋都跌左落地下都唔知,宜家回想起都感覺當時自己一個好似有少少危險。
一到行返屋企就感受到傷口不停出血,而牙醫叮囑唔可以吐水,只可以吞。而佢又冇講棉花要咬幾耐,我又見佢未止血又唔敢唔咬,最後我5點拔完牙,7點都未止血。我見2小時仲未停就開始問問有經驗的同事,原來佢地冇人試過流咁耐,開始提議我唔好咬棉花同訓一訓。
同時我男朋友專程上了我家探望我同買外賣俾我食(其實都食唔到,只係用飲筒飲粥水),而我就係屋企訓住等佢。本來我叫佢買完叫醒我,點知隻傻豬想我休息下所以餓住肚咁等我訓醒,係自己唔舒服既時候,有個咁鍚我既男人真係好幸福^^辛苦你啦,仲令到你個飯盒都凍左啦。
就係咁,我既第一次手術日就完結啦,之後就係拔牙後既後記。